文:MenClub 波特先生  圖:互聯網
POSTED ON 29 Aug 2018

亞冠盃相隔三個月後再次燃點八強戰火,其中卡塔爾球隊艾薩德首回合以3:1擊敗對手,而傳奇中場大師沙維喺呢場比場入面交出一記精彩助攻,繼續向世人展示佢無與倫比嘅傳球能力。

當比賽戰至64分鐘,雙方踢成1:1嘅時候,艾薩德中堅喺中後場用頭搥解圍,而個波岩岩飛到沙維嘅位置,其後呢位前巴塞中場球不著地以後踭「蠍子尾」助攻位於最前方嘅隊友Bounedjah,因為傳球位置實在獨到,所以Bounedjah佔了先機,並一路帶球殺入禁區,最後冷靜扭過防守射近柱破網。

憑住呢個入球,領先嘅艾薩德成功主導比賽,最後再入一球以3:1獲勝。贏得首回合嘅佢地,出線嘅機會非常大,甚至有機會繼2011年後再一次挑戰亞冠盃冠軍。

沙維自2015年加入艾薩德,今季已經係佢第4年效力呢支球隊,雖然佢已經38歲,體能速度遠不及年輕人,但係佢嘅傳球技術及經驗仍然係瑰寶,喺佢嘅幫助下,射手Bounedjah目前以11個入球成為亞冠盃嘅神射手,領先第2位嘅El-Arabi兩球。