文:MenClub 佳拿  圖:互聯網
POSTED ON 12 Oct 2018

作為一個乜類型歌都會聽啲嘅一個樂迷,有時真係覺得日本人好鬼幸福。

首先日本本土音樂嘅Market入面有好多不同嘅音樂提供畀不同界別嘅樂迷,你要主流嘅搵 Pop 嘅固然一定有,Metal 嘅又有,再冷門啲搵 Reggae 嘅,你都可以喺 Tower Record 呀,日本嘅 HMV 搵到。第二就係覺得日本樂迷對於音樂有好大嘅包容空間,不論洋樂,K-Pop,又或是喺香港被視為小眾嘅Ani-Song,都相對容易地進入到日本主流市場,增加競爭,從而咁先有進步 。

最後一點亦都係身處香港最能體會到嘅一點;就係日本真係好多嘅音樂節 (因為香港嘅音樂節真係唔多,而且有好多都係電音主題)。

不論係 Summer Sonic,Fuji Rock,Rock in Japan 或者a-nation 呢幾個聽個名都感受到夏日熱辣辣,每年喺夏天舉辦出哂名嘅音樂節外,其實仲有好多大大小小嘅各類型音樂節(當中最想提一提嘅係The Camp Book 呢個2017年開始嘅露營主題音樂節,但今日嘅主角唔係佢),當中無論係舉辦時間,又或是陣容方面特別出眾嘅一個音樂節,就係今日嘅主角———COUNTDOWN JAPAN FESTIVAL。

COUNTDOWN JAPAN FESTIVAL 喺2003年初回開催,至今每年都係會喺當年最後嘅幾日舉辦,而且係名符其實嘅年末音樂節,因為佢各個 Stage 嘅演出都真係會直落到翌年嘅 1月1日;而經歷十數年發展至今,COUNTDOWN JAPAN FESTIVAL 可以話係一個喺日本當中富有標誌性同埋極具規模嘅音樂節。正因如此,不論係小型或獨立嘅日本音樂單位,又或是各日系樂迷耳熟能祥嘅主流音樂單位,都會喺呢度出現。就以上年為例,日本女子 idol 團體——欅坂46 以及 NGT48 都有喺上年嘅 COUNTDOWN JAPAN FESTIVAL 當中參與。


欅坂46

而今年 18/19 嘅陣容雖則仲未完整公佈,但去到第三次陣容公開為此已經有 78 個音樂單位前來演出,當中不乏主流音樂單位,當中包括有木村KAELA、SILENT SIREN、KANA-BOON,仲有今年先後嚟到香港演出嘅 さユり 同埋 SPYAIR (十一月先嚟香港)。 

2.5次元女子歌手さユり (編者私心推介)

COUNTDOWN JAPAN 18/19 會喺今年嘅12月28日至12月31日,喺幕張舉行。值得注意嘅係佢哋嘅門票有別我哋香港嘅買飛方式嘅,唔需要同人比速度,而係比運氣,因為佢係要抽飛,抽中先有得去,夠哂緊張同公平。

身處香港嘅我哋,想體驗吓特別嘅除夕夜嘅話,飛幾個鐘去日本呢個 Music Festival 應該一定夠哂特別,夠哂印象深刻!

(又或者上網睇Live)

COUNTDOWN JAPAN