文:MenClub 摯樂  圖:互聯網
POSTED ON 24 Sep 2020
【真係重慶】王家衛大陸獲批拍《重慶森林2020》從黑髮警遇金髮妹開始

過去王家衛大導演憑住《重慶森林》一個兩段式平行時空的愛情故事,穿梭於迷離異國情懷嘅重慶石屎森林當中,創立其電影事業高峰 及香港電影的獨特高度。昨日,中國國家電影局正式接納,王家衛新作《重慶森林2020》正式獲准拍攝。據聞依然是兩個平行時空的愛情故事,但從獨特國際化的重慶,搬到江河燦爛的中國城市重慶當中,由失戀黑髮警察223偶遇金髮女殺手開始....我想繼續講,但你想睇嗎?入戲院睇囉,2046年應該拍完!


《重慶森林2020》係2020年9月23日立項公示正式係國家電影局備案,獲准拍攝。恭喜哂王導演同王家衛的影迷。


今集故事梗概為:90s香港,失戀警察223偶遇金發女殺手,一夜共渡短暫溫暖二人。也經歷失戀的警察663,生活漸被一位闖入的“夢中人”改變。 2036年重慶,少年小千和阿May不甘被基因配對牽手,執意找尋自己的“命運”。


單睇上面的故事,勸勉王大導要好小心,首先故事主角係警察,而女角居然唔係黑色頭髮,係中國頭髮染到鬼五馬六,金髮係好唔合符國情的正面形象!

然後失戀的警察663,生活漸被一位闖入的“夢中人”改變…呢段單睇內容就已經相當王家衛,可以想像鏡頭交錯迷離煙霧瀰漫有哂配樂同歌詞...“夢中人一分鐘抱緊接十分鐘的吻...我彷似跟你熱戀過和你未似現在這樣近,思想開始過份,為何突然襲擊我來進入我悶透夢窩激起一股震撼”

最後也是我認為電影最危險的係,「阿May不甘被基因配對牽手」,王大導要小心呀,係大陸不甘被基因配對牽手即係咩野意思?如果指健康碼絕對是我國幸福的指標,留一手啦!大家健健康康有基因配對係重慶食返個火鍋唔好嗎?作為影迷,我唔係要影響你創作自由,但我怕你辛苦拍左十年,政府唔畀你上畫,浪費影迷的期待就唔好啦。最好你都係返香港重慶大廈啦....