文:MenClub 波特先生  圖:互聯網
POSTED ON 19 Oct 2018
<iframe width="700" height="400" src="https://www.youtube.com/embed/uke0zx8mo9w" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>

波鞋,對於某部份人黎講可能只係普通鞋一對,而有一部份人會當佢係珍藏好好保存,亦都有一少撮人會當佢係生命、係一切,而人稱「毒王」嘅Horace Leung(綽號H大)就係其中一位。

Horace係波鞋網站HK-Kicks.com嘅創辦人,同時佢亦都係一名波鞋收藏家,作為70後嘅佢同唔少球迷一樣,細細個就睇NBA,而適奉係「籃球之神」Michael Jordan嘅年代,Horace就係比呢位公牛23號所征服,從而愛上呢位球員,同時亦都愛上佢所著嘅波鞋,從此佢就同波鞋結下不解緣。

而Horace印象最深,亦都可以話改變左佢一生嘅一場比賽,就係1991年嘅NBA總決賽:公牛 vs 湖人,年輕嘅佢比Jordan出色嘅球技所吸引,而佢當時所著正正就嘅係Air Jordan VI,佢好想擁有呢一對籃球鞋,但係其母親卻即時拒絕,對此佢向自己承諾未來長大後一定要買呢一對鞋,呢個情境相信唔少愛鞋之人都一定遇到過。

2003年起,Horace創建左一個波鞋網站HK-Kicks.com,係專門分享推廣波鞋資訊。作為網頁版主,Horace直言:「而家買波鞋,其實好多人都係買回以前的回憶或感情,就好似我當年買唔到Air Jordan VI一樣。」

作為波鞋收藏家,Horace粗略估計自己目前收藏左大慨1000對波鞋,而由於收藏實在太多,一時之間都好難選擇邊一對係自己最喜愛的。不過,較早前Horace就拎左自己嘅部份收藏出黎讓市民共賞,其中就包括LeBron James 2003年獲得最佳新人獎時特別推出的籃球鞋。

對於LeBron James這位目前「NBA第一人」,Horace表示如今嘅呢位「大帝」與初出道相比變左非常之多,佢指2003年嘅「大帝」絕對係自我到爆,對Fans毫不客氣。但近年,Horace有機會因為唔同嘅活動接觸到LeBron,佢認為LeBron成熟左好多,對Fans又熱情又主動,同時又見到佢願意投放資源落慈善方面,令Horace非常尊敬佢。

而作為擁有1000對波鞋嘅收藏家,究竟Horace係點樣保養佢啲珍藏嘅呢?

「儲嘅唔好著,著嘅唔好儲。」

「儲嘅波鞋一定要放喺有冷氣嘅地方,因為香港實在太潮濕。」

「只儲唔著嘅鞋,我建議用密實袋包好,再加埋防潮珠放在冷氣地方。」

「波鞋對於我黎講係生活的一部份,因為我嘅工作、嗜好都離不開波鞋,所以我同波鞋已經分唔開。」

能夠將自己嘅嗜好變成自己嘅職業,相信對於唔少人黎講都係夢寐以求的事,唔知Horace嘅故事會唔會令你回歸最初,諗一諗究竟你當初最想做嘅事其實係咩呢?