文:MenClub 波特先生  圖:互聯網
POSTED ON 28 Oct 2019

自從火箭總經理Morey支持香港爭取民主自由之後,NBA就被中方聲稱要抵制,又話要暫停播放。不過,NBA總裁Adam Silver卻企硬,表態支持美國民主核心價值,所以絕對唔會向中國跪低。

當然,NBA因為Morey喺經濟上絕對有損失,但中國總係口裡說不,身體卻很誠實,睇下騰訊只係停播NBA一個星期,就隨即再次進行直播,而於上海舉行嘅NBA中國賽,亦都可以睇見全場爆滿,根本無乜球迷真係抵制。

而作為其中一支最受歡迎嘅NBA球隊,勇士核心Stephen Curry將會進入自己與勇士於2017-18年簽下嘅第三年合同,而其年薪將會高達4023萬美元,排名新一季NBA第一位,亦同時係NBA歷史年薪歷史第一高。

作為勇士過去連續5年打入NBA總決賽,並三度奪得總冠軍嘅第一功臣,Curry雖然未曾獲得總決賽MVP,但佢絕對係勇士嘅第一核心。再加上因為早期因傷被迫與勇士簽下一份非常超值嘅合同,令勇士其後願意為佢開出超巨額5年2億美元嘅合同。

當然,Curry能夠獲得天價合同,全因為NBA於2014年與美國TNT電視台及ESPN簽下一份價值240美元嘅轉播合同,再加上其他世界各地嘅轉播合同,令NBA收入大幅增加,因此NBA球員嘅薪金亦因此獲得同步提升。

要知道Curry黎緊一年超過4000萬美元嘅收入,已經超過湖人傳奇Magic Johnson過去整個球員生涯嘅收入總和(3934萬美元),可想而知Curry呢個年薪究竟有幾誇張。