文:MenClub 波特先生  圖:互聯網
POSTED ON 17 Mar 2020

喺香港,武漢肺炎唔單止令百業蕭條,大量員工被迫放無薪假期,直接影響個人收入,生活頓成問題。

而美國疫情加劇,NBA已經宣佈無限期暫停今屆賽事,直至另行通知。NBA賽季暫停唔單止一班球迷無波睇,其實球隊各個層面嘅影響亦非常大,一班球隊工作人員收入亦都成疑。

作為今屆NBA新秀狀元,鵜鶘核心Zion Williamson亦都為球隊出一分力,決定為球隊主場場館Smoothie Kings Center員工支付一個月薪金,希望幫有需要嘅人士暫時度過危機。

唔好睇Williamson只係NBA新秀,但佢呢一年嘅收入卻非常誇張。首先,佢與鵜鶘簽下一份4年價值4420萬美元嘅新秀合同,其中頭兩年可以保證獲得2000萬美元。另外,Williamson亦與Jordan Brand簽下球鞋合同,7年合同總價值為7500萬美元。

單係以上兩份收入已經足以令Williamson成為擁有過億美元嘅富豪,仲未記其他不同公司嘅代言身份,好似佳得樂、2K Sports、Mountain Dew等等,所以Zion雖然只係新秀,其收入卻已經非常可觀。當好似Zion擁有能力嘅人能夠去幫助有需要的人,呢樣真係一件美事,但並不是必然的。