文:MenClub 波特先生  圖:互聯網
POSTED ON 12 Apr 2021

一講英式桌球你會諗起乜? 除左台上嘅22粒波之外同Cue之外,相信就一定係每位參賽球手都一定要著西裝、馬甲比賽,呢個係桌球運動一向嘅傳統。不過對於保留傳統,唔知你又覺得運動應唔應該與時並進呢?

作為上季奪得5個排名賽冠軍,同時係現時世界排名第一嘅卓林普,就覺得桌球運動一成不變,形象上已經大幅落後其他運動。

桌球運動自1870年開始,一眾參賽者都已經係著住西裝參加,呢個傳統一直黎到今日。對於呢個傳統,卓林普卻認為係桌球運動未能夠與時並進嘅證據。呢位世界第一球手指出,現時嘅哥爾夫球已經唔再係著Polo同皮鞋,而係有球手會著Hoodie同Air Max,呢個係大會已經准許的。

而卓林普直言,自己其實並唔想再著西裝同馬甲參加比賽,特別係馬甲,31歲嘅佢覺得著住馬甲係一啲都唔Cool,更何況一眾年輕球手,甚至並未進入桌球世界嘅年輕人。所以佢覺得桌球運動係時候要改變,如果唔係再繼續固步自封,只會越黎越少年輕球手願意加入呢個運動,最後只係越黎越多好似75三傑咁嘅老球手霸佔球壇,最終運動只會步入衰退及青黃不接嘅結果。

Credit: Getty Images