文:MenClub 魏文青  
POSTED ON 26 Oct 2020

基於生理結構唔同,男女對於性高潮呢樣嘢嘅反應亦相當唔同。大家男人自己都知,一次過後大家就會進入聖人模式,要提槍再戰往往都係有心冇力;但女性就可以高潮疊起浪接浪——問題係,即使對於女性連續高潮嘅紀錄可以追溯到近100年前,但實際上有關女性高潮疊起究竟係點樣嘅體驗,就冇咩人做過研究,甚至連「連續高潮」嘅定義都未有定案 (隔幾近先算連續?)。而近期於《Journal of Sex Research》發佈嘅一份研究,就希望能夠知道了解更多「女性連續高潮」啦。

研究訪問咗419名年齡屆乎18-69歲、自稱可以「連續高潮」嘅女性 (其中2/3為異性戀者),紀錄佢哋過去嘅連續高潮經驗,結果就發現幾個有趣嘅統計。首先係有近半 (47.5%) 受訪者指,自己能夠完全控制連續高潮,而另外嗰52.5%都唔係控制唔到,只係唔可以完全控制。

另外被問到同一次性愛嘅連續高潮次數,回答數字由2次到101次 (我冇打錯字) 都有,但最多人 (12%) 回報嘅數字都坐落於5至10次之間。同時受訪者亦指,比起自慰,連續高潮更容易出現於與伴侶 (不論男女) 嘅性愛之中。而且似乎都同心情好唔好,當時感覺放唔放鬆有關。

之於整個連續高潮體驗中,受訪者平均於性愛開始後11分鐘就會達到第一次高潮,其後有58%嘅會繼續接受刺激,另外嗰42%會作短或較長嘅休息,但不論有冇休息,第二次高潮都會於平均3至4分鐘內到達。至於最後停下來嘅原因,有62%係指自己已經滿足,另外嘅原因就有伴侶攰 (34%)、自己攰 (28%)等。

嗱以下呢段可能就係成篇嘢最值錢,就係女性係點樣得到連續高潮呢?不論女性係透過伴侶或自己而達到連續高潮,第一次高潮通常都係來自刺激陰蒂,但對有伴侶嘅人黎講,第二次高潮就往往來自刺激陰道。同時,使用震動器、接受口交、刺激肛門及胸部,通通都係女性能夠達到第二次高潮嘅方法之一。

換言之,所謂「女性連續高潮」並唔係真正嘅連續,甚至連個刺激本身都唔需要連續,只係女性到達第一次高潮後能夠用較短時間就達到下一次咁解。第二,就係女性要達到連續高潮,似乎係需要接受不同部位刺激,並無一個必定可行嘅套路。而且「女性連續高潮」嘅反應差異亦可以相當大,有人只有2次,有人可以過百次;有人真係浪接浪,有人就需要幾分鐘。所以如果男士們都想令女伴高潮疊起,似乎就需要與伴侶慢慢摸索。

資料來源:Female Multiple Orgasm: An Exploratory Internet-Based Survey