文:MenClub 魏文青  
POSTED ON 30 Oct 2020

歐美疫情再度爆發,美國近日迎來肺炎確診人數新高,但又正因為疫情,原本預計美國患者人數會於今年破紀錄嘅另一種疾病,確診人數反而調頭下跌近半——講緊嘅係包括淋病、梅毒、衣原體感染等嘅「性傳染疾病 (STDs)」。就咁睇,呢個似乎係一個好消息,但有專家就話,其實係另一個潛在嘅公共健康問題。

一般而言,疫情發生之後,由於禁止人群聚集,娛樂場所如酒吧、戲院甚至餐龐強制關閉,令大家搵到Casual Sex嘅機會大幅下降;理論上就係會有助減低STD嘅傳播。但根據美國醫護人員嘅研究,發現STD高危一族,即係青少年們嘅性生活基本上冇受疫情、又或防疫措施影響,亦即係話佢哋嘅感染機會亦應該係同往年一樣,咁點解新增患者人數反下跌呢?

據《New York Times》引述當地專家指,實情唔係患者人數減少,而係有去驗嘅人減少。同樣係因為疫情,令到唔少本身負責STD檢驗嘅診所需要於封城期間關閉,例如紐約州內本來有8間STD檢驗診所,但到依家都只係得3間可以繼續工作,今年初更加只係得一間。另一邊廂就算診所有開,患者又可能覺得診所係肺炎高危地點唔去。

同時,由於疫情令醫療物品供應緊張,好多STD檢驗需要嘅醫療用品都優先供應咗比疫情相關嘅設施,令到有人去到診所,診所都冇辦法為其做檢測。例如淋病及衣原體感染主要透過驗尿檢查出黎,但由於缺乏驗尿嘅工具,最後真係最到檢驗嘅人就更加少。

檢驗人數少,導致有患者根本唔知 (或唔理) 自己係咪確診,結果唔單止耽誤治療,更有可能進一步將疾病傳染開去,造成另一個公共健康問題。

資料來源:New York Times