文:MenClub 魏文青  
POSTED ON 19 Sep 2018
學著名錶評人金成早前接受我哋訪問時講,香港地嘅「勞」真係多到一街都係,行出街唔覺意都會同人撞錶。如果想更加突出,除咗買更貴更高級嘅錶之外,亦可以選擇客製或改裝錶。例如來自瑞士嘅「Artisans de Genève」就係業界內改裝Rolex嘅頂級廠商,佢哋曾經推出過基於不同型號嘅改裝Rolex,近期就以Submariner 114060 為基調,創作出呢隻「Rough Matt Diver」。

最顯眼嘅改變當然係原本頗為低調嘅黑白配色被改成藍白橙。錶圈及錶面以真空鍍膜(PVD)鍍上令人心曠神怡嘅海藍色,錶盤上嘅標記、時針、錶盤上嘅「Submarine」字樣以及錶圈上頭十個刻度均以人手飾以橙色,帶來一點點運動感。除咗顏色之外,腕錶亦用上Artisans de Genève特有嘅「Dual Tone Polishing」,錶帶及錶殼嘅上下均是磨沙,錶殼兩側就是鏡面,據說要14個巧手工匠花126個鐘先磨到出黎。

反轉背你就會見到以藍寶石打磨而成嘅錶蓋,外圈會有編號、廠名等浮雕,中間你就會見到腕錶所用嘅原廠3130機芯,但Artisans de Genève連個機芯都唔放過,換上佢哋自製嘅21K金擺陀(Rotor),唔影響準確度但好影響嗰陣貴氣!
Rough Matt Diver限量生產26隻,喺條街到「撞錶」嘅機率可謂微乎其微,售價方面係18260歐元,即係16.7萬港紙左右——我一開頭話「除咗買貴錶之外」呀可?對唔住我收返。
Artisans de Geneve