文:MenClub 魏文青  
POSTED ON 16 Aug 2019
日內瓦新進腕錶製造商Genus Watches由企業家Catherine Henry及製錶師Sébastien Billières創立,後者父親亦是製錶師,本人曾在Roger Dubuis及Urwerk工作,2011年創立自己的工場GMTI,而Genus品牌第一隻錶GNS1,就係Billières先生第一隻「為自己」而打造嘅腕錶。咁呢隻GNS1成品又係點呢?簡單啲講就係「好睇,但好難睇」。

前面嘅「好睇」,當然係指盡現大家眼前嘅機械部件,仔細睇仲可以見到夾板橋表面作磨沙處理、邊沿則是光亮打磨,睇圖已經非常經驗艷;但當你睇真啲就會發現一個問題,究竟點睇時間呢?亦即係後面嘅「好難(difficult)睇」。

「難睇」一來因為錶面線條非常複雜,二來GNS1用上非常特別嘅報時方式:首先九點位嘅白色標誌係報小時,活動嘅卻係最外圈嘅一圈小時數字,數字本身仲會每公轉1/4圈就自轉90度,確保到達指標時個數字係打直嘅;分鐘就再分為十位同個位,個位由三點位置嘅小錶盤報時,十位就要睇整個錶盤正中、寫住「50、60、10」同「20、30、40」嘅兩個圓盤,留意到側邊有條十二節嘅「蛇」嗎?白色「蛇頭」指住嘅就係十位數嘅分鐘,隨住時間流逝,呢條「蛇」更會以8字型圍繞兩個圓盤游動,代表時間無限流走。

所以當大家有幸戴起呢隻錶,又真係要睇時間嘅時候,好有可能每次都定一定神,花個幾秒鐘先睇得清時間——但相信大家都唔會介意,畢竟如此巧妙佈局及線條構成嘅畫面,望多兩眼係享受。
Genus 1.2/43mm/30米防水/18K白金錶殼/動力儲存50小時/26粒寶石/限量8隻/288500瑞士法郎(約HKD$230萬)