文:MenClub 魏文青  
POSTED ON 27 Nov 2019
早前,一隻於1953年出產嘅Patek Philippe古董腕錶被放上香港佳士得的拍賣會之上,未拍就已經預計售價至少5500萬港元,最終成交超過7000萬更加打破亞洲拍賣會腕錶成交紀錄,戴上手等如賽戴咗幾層樓,究竟呢隻Ref.2523「L’Heure Bleue」憑咩可以賣到咁貴?7000萬收藏價值又喺邊到黎?
首先,Patek Philippe出嘅錶本身就已經係熱門收藏品,就睇返今次嘅拍賣會,近300隻拍賣品中有69隻係Patek Philippe;11月頭同樣由佳士得拍出的Patek Philippe Grandmaster Chime更以2.4億港元成為史上最貴腕錶,足以顯示佢嘅地位。其次係功能,「L’Heure Bleue」來自1953年,是由義大利經銷商Gobbi製作的雙錶腕錶,採用30年代鐘錶大師Louis Cottier設計的24小時世界時間顯示功能機芯,是最早期擁有此功能的腕錶。錶盤一次過顯示四十個地區的時間,當中更有亞述群島、留尼旺同馬德拉呢啲你聽到都唔知喺邊嘅奇異地方,反映當時世人對「世界」的認知。

第三亦係最重要嘅,就係稀有度。歷史上只出現過26隻Ref.2523,其中只有七隻採用粉紅金錶殼,又只有其中五隻曾經出現於拍賣會上。而Ref.2523中間的錶盤亦有多個變化,大多數為地圖圖案(都仲要再分係邊個洲嘅地圖),僅有四隻採用半透明藍色琺瑯錶盤的曾出現於市場。兩者相加,同時擁有粉紅金錶殼再加半透明藍色琺瑯錶盤的Ref.2523,連埋今次拍賣嘅呢隻,歷史上只出現過兩隻。而兩隻當中又只有今次拍賣的「L’Heure Bleue」,在錶盤上同時擁有Patek Philipp和Gobbi的標誌。換言之,呢隻錶係真真正正的獨一無二!

品牌、功能、稀有度都是頂尖,再加上良好品項,造就「L’Heure Bleue」以7000萬成交,刷新亞洲紀錄。