文:MenClub 魏文青  
POSTED ON 26 Feb 2020

日本威士忌買少見少幾乎係威士忌愛好者嘅常識,但如果要喺日本威士忌中搵一隻最難買嘅出黎,咁個答案就好可能係輕井澤(Karuizawa)酒廠出嘅威士忌。輕井澤酒廠於1995年成立,設廠於淺間山附近,使用蘇格蘭黃金大麥釀造單一麥芽威士忌,再放入雪莉桶內熟成,但由於酒廠只運營短短5、6年就結業,所以即使成品高質,產量卻奇少,亦導致價錢年年上升,尤其20年以上的輕井澤出品更加罕有,有錢都未必買到——咁你就可想而知,Whisky Exchange推出呢兩支超過30年嘅輕井澤威士忌,係罕有到咩地步。

呢兩支輕井澤威士忌被稱為「藍寶石藝伎」系列,個樽由Elixir Distillers嘅創意總監Raj Chavda設計,即係新嘢,但個樽入面就分別係熟陳31及35年嘅輕井澤威士忌,名副其實的舊酒新瓶。其中31年限量146支,700ml售價為12500英鎊(約HK$12.6萬);35年限量105支,700ml售價為15000英鎊(約HK$15.1萬)。而且有錢都未必買到,因為要喺英國時間2月26日晚上11點59分(即香港時間2月27日上午7點59分)前,到Whisky Exchange網站Full Pay抽簽,抽到就自動過數,抽唔到就唔扣錢。咁唯有祝大家好運啦!