文:MenClub 魏文青  
POSTED ON 05 Oct 2020

Rolls-Royce除咗整車出名之外,其實整飛機引擎先係佢哋起家嘅方法。而當「汽」車都慢慢變成「電」車嘅時候,飛機業亦迎來自己嘅變革。Rolls-Royce更會與另一英國品牌、總部位於泰晤士河畔嘅Bremont合力製作電動飛機「Spirit of Innovation」以期打破每小時213英里嘅史上最快零排放飛機紀錄。

而呢隻ionBird就係Bremont為咗慶祝雙方合作而推出嘅機械天文台腕錶,亦係當Spirit of Innovation打破紀錄時,試飛員手上會佩戴嘅腕錶。手錶採用航空級43毫米超輕鈦金屬錶殼,入面配標準GMT機芯嘅BE-93AE 天文計時器,以及品牌研發的防震機芯保護裝置,保護機芯免受強大的衝擊。同時亦有兩地時間顯示。復古設計嘅時標數字及青銅指針就為腕錶加上幾分懷舊感覺。

除咗隻錶,Bremont亦與Rolls-Royce聯手研發一個手機App以輔助駕駛飛機,旨在提供檢查列表、計時功能以及各種提高現代化駕駛艙效率和安全嘅輔助功能,亦可通過全新藍牙錶帶,將ionBird天文計時器與App連線,當計時功能達標時就會即時通知飛行員。

資料來源:Bremont